Thursday, November 24, 2016

မောင်ကြီးသို့ ပေးစာ ... (၂)

အမျိုးသားအောင်ပွဲ ... ကျေးဇူးတော်နေ့ 
***

မောင်ကြီးရေ … 
.
ဒီကနေ့က ရှင်မတို့ မြန်မာနိုင်ငံရဲ့ ၉၆ နှစ်မြောက် အမျိုးသားအောင်ပွဲနေ့ပေါ့။ မနေ့က ကျောင်းမှာ စာသင်တော့ Grade 4 က ကျောင်းသားလေးတွေကို နက်ဖြန်ကျောင်းပိတ်တယ် … ဘာဖြစ်လို့လဲ သိလားလို့ ရှင်မက မေးတော့ သူတို့သေချာမသိဘူး၊ ဒါနဲ့ … National day (အမျိုးသားနေ့) လို့ ပြောပြပြီး အမျိုးသားနေ့ရဲ့ သမိုင်းအကျဉ်းချုပ်ကိုလည်း ရှင်းပြလိုက်ရတယ်။
.
Grade 4 ကျောင်းသားလေးတွေထဲမှာ သြစတေးလျမှာမွေးဖွား ကြီးပြင်းပြီး ဒီမှာ ကျောင်းလားတက်တဲ့ ကျောင်းသားလေး တယောက်လည်း ပါတယ် မောင်ကြီးရဲ့။ သူ့နာမည်က ရော်ဘင် တဲ့။ သူ့မိဘနှစ်ပါးက မြန်မာတွေပေမဲ့ သူကတော့ မြန်မာလို မပြောတတ်ဘူး၊ သူ့ကိုယ်သူလည်း သြစတေးလျန်းလို့သာ ခံယူထားတယ်။ I’m not Myanmar လို့ မကြာခဏ ပြောတဲ့ ကလေးပေါ့။
.
အတန်းထဲမှာ သူရှိနေတဲ့အတွက် သူနားလည်အောင် အင်္ဂလိပ်လို ပြောမှရတယ်။ အမျိုးသားနေ့ရဲ့ အစက လွန်ခဲ့တဲ့ ၉၆ နှစ်ဖြစ်တဲ့ ၁၉၂၀ ခုနှစ်မှာ ဖြစ်ကြောင်း၊ အဲဒီနှစ် ဒီဇင်ဘာလ ၅ ရက်မှာ နယ်ချဲ့အင်္ဂလိပ်အစိုးရ ပြဋ္ဌာန်းတဲ့ ရန်ကုန်တက္ကသိုလ် အက်ဥပဒေကို တက္ကသိုလ်ကျောင်းသားတွေ မကျေနပ်လို့ သပိတ်မှောက်ကြကြောင်း … အမျိုးသားနေ့လို့ သတ်မှတ်ကြမယ်ဆိုတော့ နေ့အမျိုးမျိုးကို စဉ်းစားရာက အမျိုးသားတော်လှန်ရေး စတင်တဲ့နေ့ဖြစ်တဲ့ ကျောင်းသားတွေ သပိတ်မှောက်တဲ့နေ့ကို သတ်မှတ်ဖို့ ဆုံးဖြတ်လိုက်ကြကြောင်း၊ အမျိုးသားနေ့ အဓိပ္ပါယ်ပိုရှိဖို့အတွက် ဒီဇင်ဘာ ၅ ရက်လို့ မသတ်မှတ်ဘဲ မြန်မာပြက္ခဒိန်ရဲ့ တန်ဆောင်မုန်းလပြည့်ကျော် ဆယ်ရက်နေ့ကို သတ်မှတ်တာ ဖြစ်ကြောင်း ... စသဖြင့် ရှင်မလည်း တတ်သရွေ့ မှတ်သရွေ့ အင်္ဂလိပ်လို ရှင်းပြလိုက်ရတယ်။
.
ဒါတွင်မကသေးဘူး …
မြန်မာပြည်သည် ဒို့ပြည်
မြန်မာစာသည် ဒို့စာ
မြန်မာစကားသည် ဒို့စကား
… ဆိုတဲ့ ကြွေးကြော်သံတွေကိုပါ အင်္ဂလိပ်လို ဘာသာပြန်ပြီး ဆိုပြ လိုက်ရသေးတာ။ ကိုယ့်စာ ကိုယ့်စကားကို ကလေးအရွယ်ကတည်းက တန်ဖိုးထားစေချင်လို့ပါ မောင်ကြီးရယ်။ ရှင်မတို့တိုင်းပြည်ဟာ ကိုယ်ပိုင်စာပေနဲ့ ဘာသာစကားရှိတယ်ဆိုတာကို သူတို့လေးတွေ ဂုဏ်ယူစေချင်လို့ ပါ။ များသောအားဖြင့် နိုင်ငံတကာ ကျောင်းတွေမှာ တက်ကြတဲ့ ကလေးအများစုဟာ မြန်မာစာကို ဂရုမစိုက်တဲ့အပြင် အထင်တောင် သေးကြတာကလား။ ရှင်မကတော့ မြန်မာစာ မသင်ရပေမဲ့ ကြုံရင်ကြုံသလို မြန်မာစာကို ချစ်မြတ်နိုးတတ်ဖို့ သိမ်းသွင်းဆွဲဆောင်ရတာပဲ။
.
အဲဒါနဲ့ တဆက်တည်း အခွင့်သင့်လို့ သူတို့လေးတွေကို လွတ်လပ်ရေးနေ့၊ ပြည်ထောင်စုနေ့ စသဖြင့် မြန်မာပြည်ရဲ့ သမိုင်းဝင်နေ့တွေကို မေးကြည့်တော့ သေသေချာချာသိသူ တယောက်မှကို မရှိဘူး မောင်ကြီးရေ။ သူတို့က မသင်ရသလိုလို ဘာလိုလို ဝေ့လည်ကြောင်ပတ် လုပ်နေသေးတာ။ ဒါနဲ့ပဲ သူတို့ရဲ့ မြန်မာစာ ဖတ်စာအုပ် ထုတ်ခိုင်းပြီး ရှာကြည့်လိုက်တော့ ဗိုလ်ချုပ်အောင်ဆန်း ဆိုတဲ့ ခေါင်းစဉ်အောက်မှာ ဇန်နဝါရီလ ၄ ရက်နေ့ဟာ လွတ်လပ်ရေးအောင်ပွဲနေ့ ဖြစ်ကြောင်း ရေးထားတာ တွေ့ရတယ်။
.
ကျောင်းသားတွေဟာ သူတို့ သင်ခန်းစာထဲမှာလည်း သင်ပါလျက်နဲ့ ဒီလိုနေ့တွေကို စိတ်ဝင်စားမှု အတော်လေး အားနည်းသွားပြီ မောင်ကြီးရဲ့။ ကိုယ့်တိုင်းပြည်အကြောင်း ကိုယ် သိထားသင့်တာပေါ့ … လို့ ရှင်မကပြောတော့ ဟိုသြစတေးလျန်းလေး ရော်ဘင်က ဒါ ငါ့တိုင်းပြည် မဟုတ်ဘူး။ ငါတိုင်းပြည်က သြစတေးလျ တဲ့။ အဲဒီလို ပါဆို … ။
***
တိုက်တိုက်ဆိုင်ဆိုင်ပါပဲ … နိုဝင်ဘာ ၂၄ ရက်နေ့ဟာ အမေရိကန်နိုင်ငံရဲ့ Thanksgiving day ကျေးဇူးတော်နေ့ ဖြစ်သတဲ့ မောင်ကြီးရေ။ သူတို့ဆီမှာလည်း အစိုးရ ရုံးပိတ်ရက် တရက်ပေါ့။ Thanksgiving day အကြောင်း ကြုံလို့ မောင်ကြီးကို ပြောပြရအုံးမယ်။ ၁၆၂၀ ခုနှစ် မှာ Mayflower သင်္ဘောကြီးနဲ့ အင်္ဂလန်ကနေ အမေရိကကို ရောက်လာတဲ့ ခရီးသွားတွေဟာ စစချင်း ကြမ်းတမ်းတဲ့ ရာသီဥတုဒဏ်ကို အတော်လေး ခံရစဉ်မှာရော ကောက်ပဲသီးနှံတွေ စိုက်ပျိုးရာမှာပါ ဒေသခံ အမေရိကန် လူနီတွေက ကူညီပေးခဲ့တာကြောင့် သူတို့ အဆင်ပြေခဲ့ရတယ်။ ကောက်ပဲသီးနှံတွေ ရိတ်သိမ်းချိန်ရောက်တော့ ကိုယ့်ကိုယ် ကျေးဇူးပြုခဲ့ဖူးသူတွေကို ကျေးဇူးတင်တဲ့အနေနဲ့ အားလုံးဖိတ်ကြားပြီး ပျော်ပျော်ပါးပါး စားသောက်ကြသတဲ့။
.
၁၇၈၉ ခုနှစ်မှာတော့ အမေရိကန်သမ္မတ ဂျော့ခ်ျဝါရှင်တန်က နိုဝင်ဘာ ၂၆ ရက်ကို National Thanksgiving နေ့အဖြစ် သတ်မှတ်ပေးခဲ့တယ်တဲ့ မောင်ကြီးရေ ... ။ ဒီလိုနဲ့ ခေတ်အဆက်ဆက် သမ္မတအဆက်ဆက် Thanksgiving day ကို ပြောင်းလဲသတ်မှတ်ရာက ၁၉၄၁ မှာတော့ နိုဝင်ဘာလ တတိယပတ်ရဲ့ ကြာသာပတေးနေ့ကို Thanksgiving day လို့ သတ်မှတ်ပြီး အများပြည်သူ အလုပ်ပိတ်ရက် အဖြစ် ကြေငြာပေးခဲ့သတဲ့။
.
အခုခေတ်မှာတော့ Thanksgiving day က မိသားစုတွေ ပြန်လည် ဆုံစည်းကြ ညစာအတူ စားကြတဲ့ နေ့ပေါ့ မောင်ကြီးရယ်။ Thanksgiving ညစာရဲ့ ထင်ရှားတဲ့ အစားအစာတွေကတော့ မောင်ကြီး သိပြီးဖြစ်တဲ့အတိုင်း ကြက်ဆင်သားနဲ့ ရွှေဖရုံသီးမုန့်ပေါ့။
.
ဆိုတော့ မောင်ကြီးရယ် … ရှင်မက ဒီရက်နှစ်ခု လာတိုက်ဆိုင်တာကို တွေးနေမိတယ်။ ရှင်မတို့ရဲ့ အမျိုးသားနေ့ဟာလည်း တကယ်တော့ ကျေးဇူးတော် နေ့ပဲလေ။
.
ဘာလဲ … မောင်ကြီးက ဘာဆိုင်လို့လဲ ရှင်မရဲ့ လို့ တွေးနေတာ မဟုတ်လား။ ဒီလိုလေ မောင်ကြီးရဲ့။ အမျိုးသားနေ့က အစပြုလို့ ကျောင်းသားတွေဟာ အင်္ဂလိပ်အစိုးရကို တော်လှန်ခဲ့တယ်၊ အဲဒီမှာပဲ အားလုံးရဲ့ ရင်ထဲမှာ မျိုးချစ်စိတ်တွေ ကိန်းအောင်းခဲ့ကြတယ်လေ။ အမျိုးသားစိတ်ဓာတ် ဆိုတာ ရှင်မတို့ တိုင်းပြည် လွတ်လပ်ရေး ရရာ ရကြောင်းရဲ့ အခြေခံ အုတ်မြစ်ပဲ မဟုတ်လား။
.
ရှင်မတို့တိုင်းပြည်ကြီး လွတ်လပ်ရေးရခဲ့တာ အရင်းစစ်လိုက်ရင် အမျိုးသားနေ့က စခဲ့တာမို့ အမျိုးသားနေ့ကို ကျေးဇူးတော်နေ့လို့ ဆိုတာ ရှင်မ မလွန်ပါဘူးနော် ... ။
.
တော်သေးပြီ မောင်ကြီးရေ ... ရှင်မရဲ့ စာ အဆုံးမသတ်ခင်မှာ ဆရာကြီး မင်းသုဝဏ်ရဲ့ အမျိုးသားအောင်ပွဲနေ့ မင်္ဂလာ နှုတ်ခွန်းဆက် ကဗျာလေး မောင်ကြီးဖတ်ဖို့ မျှဝေလိုက်ပါရစေ။
.
အိုးဝေတဲ့ တညံညံ၊
ရွှေဒေါင်းပျို တောင်ညိုဦးမှာ
ကျူးရင့်အောင်သံ။
.
အောင်ပွဲရယ်ခံ
နိုင်ငံတဲ့ သာရေး၊
မင်္ဂလာ စည်တော်ရွမ်းချိန်မို့
ခွန်းချိုဆက်တေး ။ ... ။ (မင်းသုဝဏ်)

***
ဒီကဗျာလေးက ၁၉၃၅ ခုနှစ် နိုဝင်ဘာလထုတ် ကြီးပွါးရေး မဂ္ဂဇင်းမှာ ပါခဲ့တဲ့ ကဗျာလေးတဲ့ မောင်ကြီးရဲ့။ ဘယ့်နှယ့်လဲ ... ။ အခုချိန်နဲ့ ကွက်တိပဲ မဟုတ်လား။ အိုးဝေသံတွေ တညံညံနဲ့ မင်္ဂလာစည်တော် ရွမ်းတဲ့အချိန် ... သြော် ... ဆရာကြီးသာ ခုနေရှိရင် တိုင်းပြည်အတွက်ရော ဆရာကြီးရဲ့ သားအတွက်ပါ ဝမ်းသာဂုဏ်ယူစွာနဲ့ ကဗျာတွေ ရေးဖွဲ့နေအုံးမှာလို့ ရှင်မတော့ ထင်မိတာပါပဲ မောင်ကြီးရေ ... ။
***
မောင်ကြီးရဲ့
ရှင်မ
မေဓာဝီ
(၂၄၊ နိုဝင်ဘာ၊ ၂၀၁၆)
အမျိုးသားအောင်ပွဲနေ့
၂၂း၃၈ နာရီ

No comments: